1Ti 1 | LID | STEP | Jo Pol: Jo badeh, aposel ari ai, ta Krais Jises. Idoh badeh, asahan na sahou boto-on ta Kindrei, ndramak ta seben taha ma hawe Krais Jises, iy ndramak ta taha katehei budon handru ki tan.

1 Timothy 1

Timoti badeh, katondrok kandriyen tan amwenen ma tiri mwan ma badih ta Kindrei mara-ei ale

(Kalan 1–6)

1 Jo Pol: Jo badeh, aposel ^{▼▼(1:1) Aposel badeh, batun ta atondrok iri lau ta Kindrei ma iy badeh, ndramak ta atiye sahou ta Kindrei i kon rakon rakon.} ari ai, ta Krais Jises. Idoh badeh, asahan na sahou boto-on ta Kindrei, ndramak ta seben taha ma hawe Krais Jises, iy ndramak ta taha katehei budon handru ki tan. 2 Jo atorou la-ukei dah i tam Timoti, ou naduk handru i san ta budon handru: Tikisiy ma mondrei ta tama taha Kindrei ma Krais Jises, iy Laban tataha badeh, kudu hawem.

Sahou tanan ta lau ta leheya tanan ta wasai

3 I buku jo mene indrek ou, na len jo edek ili kon Masadoniya, ta ou badeh, ado Epesus ado gwek, ta abarah lau rayah ta wasai ado badeh, saleheya tanan ta wasai. 4 Ma oro sasehek sala le ta nyala kundruh laleyah, ma hawe sasehek sare tubu oro. Bolo iri sahou doh kameh ta amekes ndrales udu bolo oro le, ya winiyan basebenei oro ta budon handru i ta Kindrei bwe, ma hawe winiyan basebenei lahou tan bwe. 5 Budon laba tinan jo asehek dah badeh, ta kandriyen ta tikisiy. Kandriyen ta tikisiy badeh, kasahan kudu ndrine ndramak mwasin keme len. Kaleheya kandriyen mwasin ta bar lewen, ma hawe budon handru. 6 Oro rayah ndraruwani budon doh, ya oro ndra-en hamon ta sahou laleyah. 7 Oro anya kasahan ndramak ta leheya kandriyen malen tiri Juwis, arile oro bala tana oro sasah oro asehek ta aliy doh bwe, ma ale oro tanan katin bwe, arile oro abadok ta aliy le ai.

8 Taha tanan, ta kandriyen malen badeh, mwasin, i buku none ndramak ki-in hamon ta aliy na len mari. 9 Taha tanan ale, kandriyen malen atehei eme badeh, ta leheya iri lau mwasin bwe. Arile, kandriyen malen atehei eme, ta leheya iri lau ta tebelese labai. I buku none iri lau ta banuhun sahou ta Kindrei bwe, ya ta i tiri lau ta amekes karei ma lomondra ndra-in, ya i tiri lau ta a-um tama iri hawe tine iri amak, ma hawe i tiri lau ta adai lau amak. 10 Ya kandriyen malen badeh, ta leheya iri lau ta karei, hawe i tiri lau mwan amekes mwan, ya i tiri badih amekes badih, ma i tiri lau ta bahana iri ndramak, ma hawe i tiri lau ta wasai, hawe i tiri lau ta wasai ta tandrakan handru i loken. Ma hawe i ta saba kandriyen bamwenen ta sahou handru bwe. 11 Sahou handru ta lomadan hawe nyosowan ta Kindrei badeh, udu bolo sahou mwasin tan, eme iy badeh, atehei eme kanik ta atiye.

Tikisiy ta Laban i ta Pol

12 Jo edeu wurah i ta Krais Jises, Laban tataha, tasah iy le badeh, edeu boto-on eme tek. Iy anyolom jo badeh, ta anuhun sahou, eme iy atehei lahou tan eme kanik jo amekes dah. 13 Jo mene bobose nyaran, ma jo mene idi iri lau tan, ma jo badeh, ndramak ta tebelese i badan. Badeh mene, tasah jo batehei budon handru bala tan bwe, ma jo bala tanan iy bala mwasin bwe. Arile, iy tikisi jo labai. 14 Tikisiy ta Laban i tataha badeh, amou handru eme bwele-ek, eme jo atehei budon tek handru i ta Krais Jises, ma jo atehei ndrinek mari i tan. Ya taha are lau ahas hawe Krais badeh, kandriyen doh, kudu tataha.

15 Ya sahou tek dah lau kanuhun, idah sahou handru aha kanuhun: Krais Jises eme andri bolo munyak ta aseben lau ta karei ma ta lomondra ndra-in. Ya jo dah badeh, ndra-in labai ja, sakalawi lau mari. 16 Ta katin doh, Kindrei tikisi jo, ta Krais Jises baruwani jo bwe, eme ya iy kaleheya iy mari udu bolok, tasah jo ndramak ndra-in labai ta lau mari. Ya jo badeh, i buku none ndramak ma mwena handru ta amekes kandriyen ndra-in. Ya, i buku none iri lau ado hamon kame kanyolom, ya eme iri katehei budon tiri handru badeh, ki ta Jises, ma iri kakohok koha iri mwasin, ta bano bwe, ta kudu le buku doh. 17 Eme ya masiye ma tudun badeh, ki ta kabin ta udu le buku doh, ma hawe ki ta kabin ta winiyan ta ano bwe, ma hawe ki ta kabin taha batou iy bwe. Ki ta Kindrei le ari doh, masiye ma tudun ki tan kudu le buku doh. Handru!

Timoti kasahan nyekelen mwasin ta bolo bahun

18 Eme naduk Timoti, jo atehei sahou batanau ewek kanim. Tasah idoh amwenen le, ta sahou mene iri propet ta Kindrei mene ndrasehek ndra-au ta nyalam. Ou andrei sahou dah ki nyara beteleu tam, ta ou kameh asahan nyekelen mwasin ta bolo bahun. 19 Ma ou tawi budon handru kaleu kudu bar tam. Tasah lau rayah bamekes bar mwasin bwe, ya budon tiri handru badeh, ndrataku. 20 Eme udu bolo oro badeh, Himeneyus hawe Aleksandra. Jo ndratehei uru ndra mine tama balik Satan. Idoh kameh ki bale uru ya hamon badeh, uru samekes luhe ndra-in ja sala ta Kindrei.